人月團圓？

唔經唔覺又過左中秋啦，因為要返夜關係，就喺工作中渡過，比平日忙足十倍，重要拉人煲蠟，下年一定要篤假。

每年中秋，例牌聽到甚麼「人月兩團圓」之類嘅廣告對白，久而久之，令到一ｄ好似我咁嘅人係中秋晚上見到個月光，就會有少少感寂寞，不過我覺得都係群眾壓力造成，所以寂寞，只維持了１０秒: P

長久以嚟對於人地講話要慶祝中秋，都有奇怪感覺，你話古時就要一家團聚，那２１世紀嘅人生活忙碌工作為先，團聚個意義就細左好多。

以前細個，我地一家人食完飯就會買定好多生果，出街賞月，最重要係可以玩蠟燭（唔係煲），重有真係玩燈籠（紙製）．．．

時代唔同，而家可能同家人食完飯就９秒９閃，約ｆｄ去行街ＢＢＱ，海灘煲蠟，玩嘅係螢光棒，燈籠？ＯＵＴ啦！我相信傳統月餅喺５０年後可能會失傳．．．
慶祝中秋，說穿了，不過係一個俾自己同朋友大吃大喝，玩餐勁嘅藉口。